كاتب شاب بعمر الخامسة والعشرون عامًا، حصل علي جائزة نجيب محفوظ بسابقة إبداع 5، وصدرت له أولي رواياته _رواية حورس_ في معرض القاهرة الدولي للكتاب 2018، وهو الكاتب ضياء الدين خليفة، يتحدث في هذا الحوار عن سرقة روايته حورس وبدايته في الكتابة والأعمال القادمة له والكثير من الأسئلة الأخري.
من هو ضياء الدين خليفة ؟
"والله ضياء كاتب اسكندراني عندي 25 سنة في كلية زراعة جامعة إسكندرية في المقام الأول قارئ قبل ما أكون كاتب عندي مكتبة كويسة في البيت بقرأ منها كتب كتير حبيت اقرأ في التاريخ شوية وده بسبب رواية كنت ناوي أكتبها لكن خيوط شدت بعضها خلتني أكتشف خط سير رواية حورس الي اثارت انتباهي جدًا انا ليا أعمال قصصية كتير واخدة مراكز أولي علي مستوي جامعات مصر لكن رواية حورس اثارت انتباهي خلتني اندمج 3 سنين في بحث عميق وطلعت بعد كدة الرواية الي حازت علي الجايزة."
ازاي أكتشفت أن عندك موهبة الكتابة ؟ وازاي دخلت المجال ده ؟
"أكتشفت أن انا عندي موهبة الكتابة من اعدادي كنت كاتب موضوع تعبير محدش بياخد الدرجة النهائية في التعبير بس المدرس بتاع اللغة العربية كان أداني الدرجة النهائية وطلع قال ضياء الي كاتب موضوع التعبير وأداني شهادة تقدير طبعًا هي شهادة تقدير ملهاش لازمة بس كانت بالنسبالي لفتت انتباهي جدًا اننا ممكن أكون فعلًا عندي أسلوب كويس في الكتابة وكدة وأنا من زمان وأنا بحب أقرأ قصص واقرأ كتب فا ده خلاني أبدأ أكتب بقي بجد أبدأ أكتب قصص وكدة وكانت فعلًا القصص بتاعتي كانت بتعجب ناس كتير يعني."
اية رأيك في الألفاظ الخارجة والسرد الجرئ في بعض الروايات ؟ وهل ممكن تستخدمهم مستقبلًا في رواياتك ؟
"والله بص انا معنديش مشكلة مع أن يكون فيه في الرواية الفاظ خارجة ومشاهد أو كدة بس يعني بحكمة يعني يحط الكاتب بحكمة يعني روايات أحمد مراد مثلًا معنديش مشكلة معاها لو أنت قصدك علي المشاكل الي بتحصل بسبب روايات أحمد مراد وكدة بس هو جه في الأواخر وزودها شوية أنا عمومًا انا عن نفسي مش بحط ألفاظ خارجة ومش بحاول أحط مشاهد جنسية تكون اوفر شوية لكن أنا شايف أن من حق الكاتب يعمل الي هو عايزه يعني هو حريته الشخصية."
اية رأيك في قنوات البوكتيوب في مصر ؟ وهل ممكن أن يغيروا حاجة في الوسط الأدبي ؟
"أولًا انا متابع لمعظم قنوات البوكتيوب الي علي الأنترنت وبحب جدًا اتفرج علي اليوتيوب وبحب أراجع الكتب علي الأقل لو مش هقرا الرواية انا بعرف الرواية الي موجودة بعرف بتتكلم عن اية بكون متابع السوق في اية بكون عارف اية الي اقدر أقراه واية الي مقدرش اقراه طبعًا البوكتيوب دي حاجة مهمة جدًا وهي يعني المستقبل بتاع الكتب في مصر."
هل ليك أصدقاء كُتاب في الوسط الأدبي ؟
"اه طبعًا ليا ياما وليا اساتذة يعني اذكرهم أكتر من الأصدقاء يعني أنا استاذ أحمد سعد الدين صاحب كتاب فرعون ذو الأوتاد وقلادة مردوخ ده أستاذي ليه فضل عليا لما أكون إن شاء الله كاتب كبير هفضل أحكي فضله ده للأجيال الي بعد مني الراجل ده دعمني مديًا ومعنويًأ وأعلاميًا وكل حاجة وطبعًا أستاذ إبراهيم عبد المجيد الي كان مُحَكم في مسابقة إبداع ده برضوا قَدملي دعم كبير جدًا وناس كتير ماقدرش أنكر فضلهم والحلقة هتبقي طويلة يعني لو قولت اساميهم كلها بس أنا بفضل الأساتذة دول يعني."
أوصف لنا كواليس كتابة رواية حورس.
"وأنا بكتب رواية حورس في أوقات كتير أوي كنت بحس أن انا لأ مش هقدر أكمل أنا مش عارف احط المعلومة دي أنا ببدأ أكتب رواية تقريرية بقطع كتير تعبت جدًا طبعًًا وكان فيه كتب كتير ومعلومات كتير كنت بعصر دماغي علشان أعرف أحطها جوا الرواية في سياق ميخلش بالأحداث وتكون ليا لازمة ومينفعش تتشال من الرواية يعني بمعني أصح وفي نفس الوقت ابدأ أفيد القارئ واقنعه وأحط له كم المعلومات الكبير الي انا اكتسبتها والي أنا عايز أصدرهاله من غير مايحس يعني أحطهاله كدة جوا الرواية من غير مايحس فكانت دي حاجة صعبة جدًا وخدت مني وقت كتير في الكتابة زي ما خدت وقت في البحث."
هل دار المعارف وفرت لرواية حورس الدعاية اللازمة علشان بيست سيلر أو الأكثر مبيعًا ؟
"دار المعارف طبعًا هي دار عريقة قديمة جدًا ليها تقولها يعتبر انا اصغر كاتب ناشر مع دار المعارف وده شرف كبير ليا دار المعارف بتوزع كويس جدًا في كل فروعها وفروعها موجودة في كل المحافظات يعني انا لما بسافر الصعيد مثلًا بلاقي ناس كتير أوي جت تقابلني لأن هما الناس دي معندهاش محلات كتب كتير زي اسكندرية والقاهرة ف بيروحوا دار المعارف ف بيشوفوا رواية حورس ف بيعرفوني لكن دار المعارف معتمدة أكتر علي فروعها وعلي توزيعها وهي نظامها قديم شوية ف مش مهتمة اليومين دول يعني إن شاء الله دي خطة مستقبلية بس هي مش مهتمة اليومين دول بالسوشيال ميديا واليوتيوب والفيس بوك ف هما مش بيسوقوا فعلًا كويس علي السوشيال ميديا مش بيوزعوا في المكتبات الخارجة ليهم لأنهم معتمدين علي الفروع بتاعتهم لكن روايتي بدأت تنزل في ألف وبدأت تنزل في مكتبات تانية وإن شاء الله قريب جدًا يعني هتبدأ تتعدل المشاكل دي وتبقي دار المعارف يعني من أكبر دور النشر توزيعًا وأكثر مبيعًا يعني في مصر."
اية موضوع سرقة رواية حورس ؟ وازاي عرفت أنها أتسرقت ؟ والموضوع وصل لحد فين دلوقتي ؟
"سرقة الرواية ده كان موضوع صادم جدًا بالنسبالي اكتشفت بالصدفة الشديدة عن طريق واحد من القراء الي قرأوا روايتي قالي ده أنت روايتك مسروقة وبعتلي رسالة علي الماسنجر الرواية بصيت علي فعلًا لقيتها كوبي بيست من روايتي بالاهداء طبعًا دمي اتحرق مجهود السنين الي انا لسة بحكي عليه أتاخد في كلمة حسيت بقيت ببص علي كلمة كلمة في الرواية وأقول حرام يعني حرام الي تعبت فيه ده كلو يتاخد كدة بسهولة كدة فطبعًا ربنا الحمدلله يعني نصفني بعدد كبير جدًا من الكُتاب الكبار والصغيرين الي تعاطفوا معايا والي قدموا دعمهم سواء دعمهم من جهة قانونية او من الجهة الإعلامية والحمدلله يعني أنا الأوراق كلها في صفي والأوراق كلها موثقة من الوزارة ومن الجامعة ومن دار المعارف وسابقها في رقم الايداع وسابقها في كل حاجة ف سهل إن شاء الله أعرف أخد حقي منها بس الاجراءات المفروض ان هي بتاخد وقت شوية يعني لكن الشؤون القانونية بدأت تتحرك بالفعل وإن شاء الله قريب نسمع اخبار يعني كويسة."
هل شايف موضوع سرقة رواية حورس أنو فادك كتير ؟
" موضوع سرقة الرواية ماقدرش أقول ان هو فادني بس يعني هو فادني اه بس هو ضرني كتير يعني هو ضرني نفسيًا ضرني من حيث الشغل بتاعي انا مبقتش عارف اتابع الشغل مبقتش عارف أكتب يعني انا شغال في رواية جديدة دماغي مش فاضية دلوقتي أن انا اكتب فيها طبعًا بدأ يتطلع ناس رغم كل الأدلة تقول لأ ده اشمعنا ده هو لسة أول رواية ليه فأكيد هو الي سارق ف ده طبعًا كان كلام بيضايقني وأنا من النوع الي مبحبش أسمع كلام كتير زي ده ف طبعًا الموضوع ضرني كتير نفسيًا وأخد من وقتي كتير جدًا ومكالمات وحاجات بدأت تبقي مزعجة بالنسبالي ف الموضوع أزعجني طبعًا هو ممكن يكون فادني شوية شهرة بس يعني تأخيل مثلًا بعد كدة لو حصل صدفة مثلًا وكاتب تاني سرق مني مثلًا حاجة تانية ف انا هاجي اتكلم في الموضوع ده وأقول مثلًا ده الكاتب سرق مني فالناس هتبدأ تشك في مين هتشك فيا أنا لأن دي تاني مرة تحصل معايا ف اذن لأ انت بقي الي فيك مشكلة فبدأ الموضوع يبقي وصمة سيئة في تاريخي الأدبي الناس كتير حتي لو هما مش بيظهروا ده فقدوا ثقة فيا وده طبعًا موضوع جارحني جدًا وأكيد يعني الموضوع ليه اضرار كتير يعني هو فادني اه الرواية اتشهرت والناس كتير حبت تقرأ الرواية إن شاء الله المحكمة تصدر بيان ينصفني بس انا شايف اسمي اتأثر كتير ككاتب يعني."
هل هتستمر في القالب التاريخي ولا ممكن تكتب حاجة واقعية ؟
"هو التاريخ واقعي يعني، أكيد هكتب طبعًا انا روايتي حورس رواية تاريخية الرواية الي جاية إن شاء الله هتكون تاريخية بس هي رواية أدب رحلات أكتر من هي تاريخية ومغامرة لكن برضوا أحداثها تاريخية الرواية الي بعدها مش تاريخية هي تعتبر science fiction "خيال علمي" بس في تاريخ قديم مش عايز احرق احداثها بعد كدة لأ انا هبعد عن القالب التاريخي خالص هعمل أحداث في العصر الحالي يعني."
هل هتستمر مع دار المعارف ولا هتفضل أنك تتعاقد مع دار نشر خاصة ؟
"ده موضوع مُحير يعني انا سواء كنت هستمر مع دار المعارف ولا لأ ؟ هنشر مع دار تانية ولا لأ ؟ دي حاجة لحد دلوقتي انا confused "مشوش" جدًا مش عارف أخد قرار يعني أنا شوية هقول اه شوية هقول لأ الناس دي بتخدمني وبتساعدني في حاجات كتير العيوب الي انا قولت عليها المفروض أن هي هتتعدل قريب ف انا لسة القرار ده ماقدرش أقولك عليه وحتي لو قولتلك ممكن أغيره لأن انا كل يوم باخد قرار شكل ف مش عارف بصراحة هي الرواية الجاية يعني خلصت لكن أنا لسة لحد دلوقتي بفكر هبعتها لأنهي دار بالظبط."
من الأعمال الجديدة ليك هم رواية "امير بلاد السند" ورواية "هومو" ممكن تقولنا نبذة عن كل رواية ؟
" اه انت كدة هتخليني اخش في تفاصيل والحاجات دي انا لسة محتفظ بيها سرًا هي طبعًا كفاية ان انا قولت أسم الرواية "أمير بلاد السند" الرواية أدب رحلات تشبه لحورس كتيير ف أن هي بتتكلم عنـ يعني حورس أسطورة معروفة بدأت أتكلم عنها أن هي قصة حقيقية يعني انا بدأت أقول تخيل لو حورس قصة حقيقية وفعلًا بدأت أوصل ل أدلة كتير جدًا تُثبت أن حورس كان موجود بجد وبدأ يتحول لـ اله مع الوقت ف لحظت أن انا بكرر تجربة حورس تاني بالصدفة الشديدة أن فيه أسطورة تانية كبيرة أسطورة معروفة جدًا ممكن تكون أكتر من حورس أتعمل عنها أفلام ومسلسلات كتير مش عايز اقول أسمها دلوقتي الاسطورة دي أسطورة عربية تخيل بقي أن الأسطورة دي قصة حقيقية يعني الشخصية الي أنا هتكلم عنها في أمير بلاد السند هي شخصية أكثر شهرة من حورس وقصة حقيقية ف دي قصة بلاد السند من غير ما اقول الاسطورة دي يعني، أما رواية هومو الي بعدها ف هي رواية بتتكلم من منظور علمي شوية عن بدايات الأنسان والأنسان البدائي والحاجات دي أنا بقول أن التطور ملهوش علاقة بالدين وأن أنا مؤمن بالله زي ماانا مؤمن بالتطور لكن طبعًا ممكن يكون فيه قصص مش متوافقة بين الدين والتطور وكدة ف في خلل معين هل الخلل ده في مفهومنا للدين ولا في مفهومنا للتطور؟ ف أنا بحاول أوفق بين الخلل ده يعني في رواية هومو وإن شاء الله تكون رواية موفقة أنا بكتبها دلوقتي وشايف أن هي إن شاء الله رواية ممتازة يعني."
شكرًا جزيلا لك أستاذ ضياء وأتمنالك التوفيق دائمًا.
"حبيبي يا حسام أنا بحب أتابعك جدًا وأنا بشجعك جدًا أنا شايف أن أنت كـ شاب صغير بتعمل حاجة كبيرة أنا نفسي أدعمك لأن أحنا هنا عندنا فكرة الشباب الصغير ولأ ده لسة صغير ده لسة ميقدرش ييعمل والكلام ده لكن لأ طبعًا يعني بره أنت بص علي جاستن بيببر وبص علي مايلي سايرس ناس سنهم صغير لكن التوب في المجال بتاعهم الفني وأنا مؤمن جدًا أن فيه شباب صغير زي حسام ممكن يقدر يعمل حاجة ممكن يغير حاجة في المستقبل وعلشان كدة أنا بدعم حسام ووافقت أطلع معاه ومبسوط جدًا أن أنا موجود معاه ومبسوط جدًا أن انا شايفه يعني ....بس."
حساب الكاتب ضياء الدين خليفة علي الفيسبوك :
ولمشاهدة الحوار بالكامل علي اليوتيوب :
