تحليل الغلاف :
الغلاف عبارة عن سيقان من نبات البامبو وفي الاعلي والاسفل سجادة ذات نقوش والملحوظ ان اللون الاخضر مسيطر علي الغلاف وده مدي راحة للعين اكتر، الغلاف حلو جداً وأول ما تشوفوا تعرف أن ده غلاف رواية ساق البامبو بس مشكلته انو مربك شوية، عشان كدة تقييمي للغلاف 4/5أسم العمل :
اسم الرواية مختار بدقة جداً ومميز ومن الأسماء الي متتنسيش وليه علاقة صغيرة بأحداث القصة
انطباعي عن الرواية قبل ما اقرأها :
كان جيد بنسبة 100% وده بسبب انها حاصلة علي الجائزة العالمية للرواية العربية "البوكر" عام 2013 وأغلب آراء القراء إيجابية وفي صالحها، توقعاتي عنها انها رواية تقيلة ادبياً تستفيد منها بكذا حاجة من متعة ومفردات جديدة ورسالة
انطباعي عن الرواية اثناء قرأتها :
في صعود مستمر ودا بسبب التشويق في الاحداث والدراما المحترمة المؤثرةدا غير الحوار واللغة وأسلوب السرد، يعني انطباعي اثناء قرأتها كان ممتاز جداً وفي أعلي الدرجات وفي تزايد مستمر
قصة الرواية :
الرواية بتتكلم عن رجل كويتي وهو "راشد" وسيدة فلبينية وهي "جوزافين" الي كانت بتشتغل عن أهل راشد، فبتنشأ علاقة حب بينهما بعد كدة بتتطور لتصبح زواج عرفي وينتج عن ده إنجاب لم يكن في الحسبان وفي ليلة تشهد ميلاد بطل الرواية عيسي، ويبدأ مع ميلاده صراع الاعتراف به
فكرة الرواية والهدف منها :
الرواية بتتكلم عن موضوع العمالة الأجنبية والزواج المختلط في المجتمع الكويتي بالإضافة إلي رسائل دينية وتاريخية وسياسية
المناقشة :
1- الرواية حاصلة علي جائزة البوكر عام 2013 وجائزة الدولة التشجيعية بدولة الكويت عام 2012 دا غير انها اتحولت لمسلسل تليفزيوني أتذاع في رمضان 2016
2- الكاتب سعود السنعوسي عمل حيلة ذكية في الرواية بس مش عايز احرقهلكم هسبكوا انتوا تعرفوها والحيلة دي ادت لمسة عبقرية للرواية
3- الرواية درامية جداً مليانة فرحة وجزن هتعيشها مع كل كلمة
4- الشخصيات كانوا كتير جداً وأحتمال تتلخبط بينهم بس طلما الرواية بصيغة المتكلم سهل عليك كتير علشان هتركز مع شخصية واحدة وهي هتعرفك علي باقي الشخصيات
5- اللغة بسيطة وفي نفس الوقت قوية
6- أسلوب السرد في منتهي البساطة والجمال وخالي من أي كلكعة أو فزلكة وفي نفس الوقت وصلك الفكرة والاحداث بخيال واسع
7- الحوار كان ممتاز جداً علي الرغم من قلته
8- الحبكة مظبوطة ومبنية صح وهتعرف ده مع نهاية الرواية
9- مكنش مطلوب من الرواية انهي تقدم نهاية غير متوقعة أو عكس التوقعات "اية ده والله نفس المعني" ومع ذلك النهاية ممتازة
اقتباس :
" الغياب شكل من أشكال الحضور يغيب البعض وهم حاضرون في أذهاننا أكثر من وقت حضورهم في حياتنا" " اليد الواحدة لا تصفق ولكنها تصفع والبعض بحاجة ليد تصفق له بقدر حاجته ليد تصفعه لعله يستفيق"
التقييم :
تقييمي لرواية ساق البامبو للكاتب سعود السنعوسي هو 5/5 ومبروك لأول رواية تاخد العلامة الكاملة، الرواية رائعة فعلاً انصحكم بقرأتها بشدة
#اقرأ_لأن_في_القراءة_حياة
ولمشاهدة الحلقة علي اليوتيوب :
